Mark 13
Jesus e hagi aga di haga mooho o di Hale Daumaha
(Matthew 24.1,2; Luke 21.5,6)
1Di madagoaa o Jesus ne hagatanga i di Hale Daumaha, tangada i ana dama agoago ga helekai, “Tangada Agoago, mmada gi nia hadu mono hale le e- humalia!” 2Jesus ga helekai anga, “Goe e gidee nia hale humalia aanei? Di hadu e dahi ga dubu i dono lohongo ai. Nia hadu huogodoo ga meheu gi lala.”Nia haingadaa mono haga huaidu
(Matthew 24.3-14; Luke 21.7-19)
3Jesus nogo noho i hongo di Gonduu Olib, i di baahi adu gi di Hale Daumaha, gei Peter, James, John mo Andrew ga maanege adu gi baahi o mee, ga heeu gi mee mada ginaadou, 4“Meenei, hagia mai be nia mee aanei le e hai ma ga hee, ge hagailongo gi di aha, bolo ma gu hoohoo ga hai?” 5Jesus ga helekai, “Goodou pula i goodou, gi dee halahalau hua go tangada. 6Idimaa, dogologo e lloomoi i dogu ingoo, ga hagi adu: Au go mee. Gei nia daangada dogologo ga halahalau go digaula. 7Di madagoaa goodou ma ga longono nia lee dauwa ala e hai hoohoo mai mono longo dauwa ala e mogowaa, goodou hudee uli godou gai. Nia mee aanei le e hai loo gi kila, gei hagalee haga modongoohia bolo di hagaodi gu dau mai. 8Nia henua ga heheebagi, nia king ga heheebagi, nia madagowaa huogodoo i henuailala ga ngalungalua, nia tau hiigai ga i-golo. Nia mee aanei le e hai gadoo be di mmae matagidagi o di ahina ma ga haanau. 9Goodou gi noho kanakana, idimaa, goodou ga lawalawa go nia daangada ga lahi gi di gowaa hai gabunga. Goodou ga haga mamaawa i lodo nia synagogee ga lahi gi mua nia king i dogu gili, bolo goodou gi haga modongoohia gi digaula di hai di Longo Humalia. a 10I mua di hagaodi ga dau mai, di Longo Humalia e hai gi dele gi dau gi nia henua huogodoo. 11Malaa, goodou ma ga lawalawa, ga lahi gi di gowaa hai gabunga, gei goodou hudee maanadu e logo be goodou ga helekai bolo aha i mua digaula. Goodou helekai hua nia mee ala ga gowadu gi goodou i di madagoaa deelaa. Idimaa, nia helekai ala ga helekai ai goodou, la hagalee mai godou baahi, nia helekai mai di Hagataalunga Dabu. 12Nia daane ga wanga nadau duaahina daane gi daaligidia gi mmade. Nia damana hogi ga wanga nadau dama gi mmade, gei nia dama ga hai baahi gi nadau maadua, ga wanga digaula gi daaligidia gi mmade. 13Digau huogodoo ga de hiihai adu gi goodou i dogu gili. Be koai hua dela e dadaahi dono hagadonu ga dae loo gi di hagaodi ga mouli. bDi ada mee haga manawa gee dangada
(Matthew 24.15-28; Luke 21.20-24)
14“Goodou ga gidee di ada mee haga manawa gee dangada e duu i lodo di gowaa hagalee duudanga belee duu ai. (Tangada dela e dau di haga iloo deenei, la gi iloo ia tadinga o di maa!) Di madagoaa hua deelaa, digau ala e noho i Judea la gi llele gi daha gi tomo nia dama gonduu. c 15Tangada dela i tomo dono hale, la hudee hai bolo ia e haneia gi lala e kae ana mee i lodo di hale. d 16Tangada dela i lodo henua, la hudee haneia bolo e kae dono gahu. 17Koia e huaidu ang gi nia ahina hai dama, mo nia ahina nadau dama lligi i nia laangi aalaa ma ga dau mai! 18Goodou dalodalo bolo nia mee aanei gi hudee heia adu i di madagoaa magalillili! 19Idimaa, nia haingadaa o nia laangi aalaa, la koia e huaidu huoloo i nia haingadaa mai taamada di madagoaa ne hai henuailala go God, ga dae mai loo gi dolomeenei. Nia huaidu beenei e kila aga labelaa maalia ai. e 20Malaa, Dimaadua e haga hogoohi nia laangi aalaa, maa mee ga hagalee hai beelaa, deai tangada e mouli ai. Mee e haga hogoohi mai nia laangi aalaa, ne hidi mai di gili ana dama ala gu hilihili. 21Tangada ma ga helekai adu gi goodou, boloo: Deenei di Mesaia! be e helekai boloo: Deelaa a mee, goodou hudee hagadonu ina. 22Idimaa, nia mesaia dilikai mono soukohp dilikai ga kila aga i golo. Digaula ga hai nadau hagailongo haga goboina mono mogobuna, belee halahalau nia dama a God ala gu hilihili, be di maa e mee. 23Gi pula i goodou. Au e hagi adu nia mee aanei huogodoo i mua di madagoaa.Di hanimoi o Tama Tangada
(Matthew 24.29-31; Luke 21.25-28)
24“Nia laangi ala i muli di haingadaa damana, di laa ga bouli, gei di malama ga hagalee maahina. f 25Nia heduu o di langi ga monnono ia, gei nia mogobuna o di ahiaalangi ga ngalungalua gi daha mo nadau lohongo. g 26Gei goodou ga mmada gi Tama Tangada e haneia i lodo nia gololangi, i nia mahi mono madamada aamua. h 27Gei mee ga hagau ana gau di langi gi nia mada e haa o henuailala, belee haga dagabuli mai digau a God ala gu hilihili, e loomoi i nia mada huogodoo o henuailala.Di agoago e hagatau gi di laagau-‘fig’
(Matthew 24.32-35; Luke 21.29-33)
28“Goodou gaabee di mee deenei e hagatau gi di laagau-‘fig’. Nia manga o di maa ala ma ga matilitili, ga tomo ono lau, goodou gu iloo bolo di madagoaa mahanahana la gu hoohoo mai. 29E hai gadoo beelaa, be goodou ala ma ga gidee nia mee aanei ala ma ga kila aga, gei goodou gu iloo hua, bolo di madagoaa gu hoohoo mai, gu togomaalia ga daamada. 30Gi langahia bolo nia mee aanei le e kila, e hai i mua di adu dangada dela e mouli dolomeenei ma ga mmade huogodoo. 31Di langi mo henuailala le e odi, gei agu helekai la hagalee e odi.Tangada e iloo ia di laangi mo di aawaa ai
(Matthew 24.36-44)
32“Di laangi deelaa mo dono aawaa, deai tangada e iloo ia ai, digau di langi e de iloo, mo dana Dama daane hogi e de iloo ia labelaa, dela hua go Tamana modogoia e iloo ia. i 33Noho kanakana, i goodou e de iloo di dae mai di madagoaa. 34E hai gadoo be taane ma ga hai dono ala e hana haga mogowaa, ga dugu ana gau hai hegau belee benebene dono hale, ga wanga nadau moomee e hai. Geia ga helekai gi di hagaloohi o di bontai, bolo gi noho hilahila gi daha. j 35Malaa, goodou gi noho kanakana, i di hanimoi di tagi o di hale la de iloo goodou, be ma hiahi, be i di waelua di boo, be i mua di ada, be i mua di laa e hobo. 36Maa mee ga limalima dono hanimoi, mee gi dee boogia hua goodou e kii. 37Agu helekai adu gi goodou, le e helekai gi digau huogodoo, bolo goodou gi noho kanakana.”
Copyright information for
KPG